ՏԱՐՎԱ ԹԻՎԸ - 673
Շատերն են ամփոփում 2015 թվականը՝ մատնանշելով ամենատարբեր ցուցանիշներ։ Ու, որպես կանոն, այդ ցուցանիշների համաձայն մենք անկում ենք արձանագրում բոլոր հնարավոր և անհնարին բնագավառներում։ Սակայն կա մի ոլորտ, որտեղ մենք Հանրապետության Նախագահի ջանքերի շնորհիվ անվիճելիորեն կարող ենք համարվել համաշխարհային առաջատար:
Վիճակագրությունը, ինչպես ասում են, գիտե ամեն ինչ։ Եվ այսպես, 2015 թվականին Հանրապետության Նախագահի հրամանագրերով 44 անձ պարգևատրվել է շքանշաններով, այդ թվում՝ 1-ը՝ «Մարտական խաչ» 1-ին աստիճանի շքանշանով, 5-ը՝ «Մարտական խաչ» 2-րդ աստիճանի շքանշանով, 1-ը՝ «Հայրենիքին մատուցած ծառայությունների համար» 1-ին աստիճանի շքանշանով, 11-ը՝ «Հայրենիքին մատուցած ծառայությունների համար» 2-րդ աստիճանի շքանշանով, 10-ը՝ Բարեկամության շքանշանով, 11-ը՝ Պատվո շքանշանով, 3-ը՝ Սուրբ Մեսրոպ Մաշտոցի շքանշանով և 2-ը՝ Սուրբ Վարդան Մամիկոնյանի շքանշանով։ Եվս 514 անձ պարգևատրվել է մեդալներով, այդ թվում՝ 26-ը՝ Արիության մեդալով, 75-ը՝ Երախտագիտության մեդալով, 12-ը՝ «Հասարակական կարգի գերազանց պահպանման համար» մեդալով, 16-ը՝ «Հայրենիքին մատուցած ծառայությունների համար» 1-ին աստիճանի մեդալով, 80-ը՝ «Հայրենիքին մատուցած ծառայությունների համար» 2-րդ աստիճանի մեդալով, 12-ը՝ Մխիթար Հերացու մեդալով, 19-ը՝ Մխիթար Գոշի մեդալով, 15-ը՝ Անանիա Շիրակացու մեդալով, 45-ը՝ Մովսես Խորենացու մեդալով, 17-ը՝ «Աշխատանքային վաստակի համար» մեդալով, 195-ը՝ Մարտական ծառայության մեդալով, 2 ընտանիք՝ Ծնողական փառքի մեդալով։
Տարին առատ էր նաև պատվավոր կոչումների մասով. 5 անձի շնորհվեց ժողովրդական արտիստի, 3-ին՝ ժողովրդական նկարչի, 10-ին շնորհվեց մշակույթի վաստակավոր գործչի, 7-ին՝ արվեստի վաստակավոր գործչի, 1-ին՝ գիտության վաստակավոր գործչի, 6-ին՝ ֆիզիկական կուլտուրայի և սպորտի վաստակավոր գործչի, 4-ին՝ վաստակավոր մարզչի, 4-ին՝ վաստակավոր բժշկի, 21-ին՝ վաստակավոր մանկավարժի, 18-ին՝ վաստակավոր արտիստի, 3-ին՝ վաստակավոր ճարտարապետի, 5-ին՝ վաստակավոր նկարչի պատվավոր կոչում։
Բացի այդ՝ 1 հոգու շնորհվեց գեներալ-լեյտենանտի, 1 հոգու՝ գեներալ մայորի զինվորական կոչում, 2-ին՝ Ոստիկանության գեներալ-մայորի, 1-ին՝ Արդարադատության գեներալ-մայորի հատուկ կոչումներ, 5-ին՝ Արտակարգ և լիազոր դեսպանի, 13-ին՝ արտակարգ դեսպանորդ և լիազոր նախարարի դիվանագիտական աստիճան, 2-ին՝ ՀՀ քաղաքացիական հատուկ ծառայության 2-րդ դասի պետական խորհրդականի, 1-ին՝ ՀՀ պետական ծառայության 2-րդ դասի բարձրագույն խորհրդականի, 1-ին՝ Հայաստանի Հանրապետության քաղաքացիական ծառայության 2-րդ դասի բարձրագույն խորհրդականի, 1-ին՝ Արդարադատության երկրորդ դասի պետական խորհրդականի դասային աստիճաններ։
Այսպիսով՝ 673 հոգի անցած տարում արժանացավ Հանրապետության Նախագահի ուշադրությանը։ Այսինքն՝ ամեն օր պարգևատրվում էր միջինում մոտ երկու հոգի։
Միայն թե մեկ հարց է մնում բաց՝ բա ժողովուրդն ինչո՞ւ է դժգոհ, եթե այդքան մարդ օր ու գիշեր «բարեխիղճ ու արդյոնավետ» ծառայում է հենց իրեն....